عايزه اعبر عن يومى النهارده
عايزه اصرخ واطلع الشحنه اللى جوايا من امبارح
عايزه اقول بأعلى صوت أحمدك يارب
واقول كمان لمامتى
انا بحبك قوى
وانتى غاليه عندى قوى
ووالله افديكى بروحى
وعايزه اقولها وبشر الصابرين
بجد مش قادره اعبر عن اللى جوايا
مشاعر كتيره عكس بعضها
فرحانه قوى وخايفه قوى
ممكن يكون خوفى من مافيش
بس الحمد لله
,,,,,,,
صراحة اليوم النهارده مع اخواتى الصغننين كان ما يتوصفش بجد كان تحفه
بس لو ما كانتش القلق متملكنى كنا بدعنا سوا
اكيد يعنى رؤى ورنيم بدعو وماشاء الله يعنى هما شطورين وهاديين وبيسمعو الكلام لدرجة انى كنت بصرخ من الغيظ
ولسانى وجعنى من كتر ما قولت بس يا حبايبى بس يا عسولاتى
اللى اتقلبت ف اخر اليوم بس يا بت منك ليها اهدى شويه يا زفته سيبى التليفون يا نيله
يااه د اخواتى دول هاديين هداوه بس على مين
اذا كانو هما شمشون انا عنتر
هااا
بس بجد دول ولادى حبيبى وانا بمووووووووووت فيهم وف شقاوتهم وعصبيتهم ولعبهم وكلامهم
ومش بتدايق لما اغير لرنيم البالمرز دانا بفرح عشان هى بتضحك وبتكون فرحانه
ولا بتدايق من رؤى وهى ما شيه ورايا وعماله ترغى وتفسد ف اى حاجه ف وشها
بحب الشقاوه اللى فعنيها قوى
وكسوفها وهى بتعترف بالغلط
يااااااااااااه يا حبيباتى
,,,,,,,,,
انا بقا النهارده كنت ست بيت ممتازه
وماما شهدت لى بكده وفرحت بيا لما رجعت بالسلامه
بدأاليوم بأن اخواتى صحيو
ورنيم كانت متدايقه وبتعيط عشان ما ما مش ف البيت
بس انا صالحتها وبطلت عياط
فطرتهم
واخدتهم ع الحمام وحمتهم
وجه بقا ساعة التسريح
اسرح لمين الاول
رنيم قاعده قدامى ورؤى واقفه متربصالى وماسكه ف ايدها بتاع عشر توك
وعايزه زعارير كتييير
فقولت ابدأ برنيم دى ما عندهاش غير شعريتين بس المهم باى توكه
سرحت لانومه
وبعديها بقا اخدت من رؤى كل التوك وماعملتلهاش غير زعرورتين
ويا دوبك خلصت رؤى لقيت رنيم عنكشت شعرها
يووووه
رحت مسرحاه تانى
بس رؤى شطوره ما مسكتش شعرها
المهم
رحت بقا انضف البيت
وهما ماشيين ورايا زى النحله
احلى حاجه بقا
واكتر حاجه تفرس النهارده ان رنيم حبت تنام وبعد معاناه نيمتها ويا دوبك بعديها بربع ساعة لقيتها بتصرخ جامد
رحتلها لقيت رؤى قاعده قريب منها ومربعه اديها وواضح انها عمله عامله
هتكون عامله ايه يعنى
اكيد ضربت انومه الغلبانه الصغنونه دى
صالحتها ولعبتها
صالحتها ولعبتها
وجبتلهم زبادى وبتهم ورحت المطبخ
يا دوبك ما عداش ثوانى
جعت لقيت وشهم ابيض من الزبادى والهدوم والارض وكله نيييييييله
وهما الانين عمالين يضحكو ومبسوطين قوى
اعمل ايه انا ؟؟
اكيد قعدت اضحك معاهم
يا دوبك ما عداش ثوانى
جعت لقيت وشهم ابيض من الزبادى والهدوم والارض وكله نيييييييله
وهما الانين عمالين يضحكو ومبسوطين قوى
اعمل ايه انا ؟؟
اكيد قعدت اضحك معاهم
المهم بقا عملت الغداء وعيونى وجعتنى من البصل
وحالتى كانت حاله
وغدتهم وغيرت لهم تانى وقعدنا نتفرج على الكارتون سوا
وشغلنا اغانى واقعدنا نتنطط ونرقص ونلعب لحد بابا وماما واخواتى ما رجعو
,,,,,,,,,
كل ده وانا هموت من القلق
كان يوم عصيب جداا جداا
بس الحمد لله
عدى على خير
واتطمنا كلنا
واحلى حاجه شفتها النهارده نظره ف عيون بابا زى اللى بيقول فيها الحمد لله انى خلفت رجاله
حسيت ان بابا وماما بيحبونا قوى وبيخافو علينا قوى
وانا بجد بموت فيهم ومااقدرش اعيش من غيرهم ولا بعيد عنهم
ربنا يخليهم لينا
ليست هناك تعليقات:
إرسال تعليق
اترك لك هنا نبضة