الأربعاء، 31 أغسطس، 2011

النسيان








النسيان


الإنسان من اسمه النسيان


كثيراً ما ننسى


ننسى أوقات فرحنا


وأوقات حزننا


ولكننا لا ننسى أحبابنا


ولا ننسى قلوبنا


قد نتركهم ولكننا لا ننساهم


ففى قلوبنا نقشت أسماؤهم


فأنا لا أعلم كيف أنسي


وعندما أنسي


أنسي كي لا أنسي


أنسى كى أتذكر


أنسى كى أحب


كى لا يتلوث قلبى


لعل أحد يفهمنى


يشعر بما يدور بخاطرى


فلا تطلب منى النسيان


ولا تجبرنى عليه


أفعل ما تشاء


ولا تجبرنى أن أفعل ما تشاء


إننا أصبحنا شخصين بقلب واحد


وإن أختلفت الآراء


لكل منهم حياته 


يعيشها كما يشاء


ينسى من يريد ويتذكر من يريد


ننتظر يوم تتصالح معنا الأيام


وتتقابل الأقدار


ننتظر صفح الزمان


ورحمة المنان


سأعيش طوال حياتى 


على أمل اللقاء ولو بعد الف عام


وأن تشرق شمسنا من جديد


بعد طول غروب


سأترك ما فى قلبى لربى لعله يأتى يوم ويخفف المى


وسأتركك للايام ولا اريد ان اسمع منك اى كلام

الثلاثاء، 30 أغسطس، 2011

العيييد ^^




كل سنة وانتو طيبين

ومتهنيين وفرحنين

,,,

مش عارفه ليه مش حاسة بالعيد السنة دى خااالص

مافيش فرحة ولا واى حاجة تحسسك بالعيد

الواحد مزروع فى قلب البيت

من النت للتليفزيون للكتب وخلااااااص

مافيش الحاجات الحلوه بتاعة زمان دى

مافيش لا مراجيح ولا فسح ولا لعب ولا تنطيط

بجد حاجة اخر ملل

العيد زمان كان مختلف خالص عن دلوقتى

كفاية انك كنت تصحى الصبح 

وتلبس الهدوم الجديده 

وتنزل تشترى مسدس الميه وترش بيه اخواتك

والا البمب والصواريخ ومسدسات الرش 

والجرى والتنطيط 

يااااااه كل ده راح فين

يمكن علشان اكبارنا خلاص 

والا علشان مابقاش لينا نفس لاى حاجه

وكفاية المشاكل والافكار اللى شغلة دماغنه

مابقناش لقيين ساعة صفاء زى زمان

ساعة ايه لا ولاحتى دقيقة صفاء مش ساعة

نفسى افرح بالعيد زى زمان 

اجيب بلالين كتير وانفخها واطلع على السطح واطيرها

اروح اعيد على قرايبى واخد العديه ^^

,,

مش عارفة ليه كل حاجة مابقاش ليها طعم كده ليه 

حتى الفرح بقا مالهوش طعم ونادر لما يدخل قلبنا

ممممم

ايه الكلام الغم اللى انا عمالة اقوله فى اول يوم العيد ده 

يلا افرحو وزقطتتو واللعبو وفرقعو صواريخ

انا هروح ابعت اختى تجيبلى بلالين وحاجات 

يمكن اعرف افرح بالعيد

كل سنة واتنو طيبين 

وربنا يجعل ايامكم كلها عيد ^^

الأحد، 28 أغسطس، 2011

اسفه سيدى



لااقبل ان اكون تلك الانسانه التى تقضى معها فترة من حياتك
ثم تمحيها من سجل ذكرياتك

اســــــــــفه سيدى
فانا لست قصه تحياها لتستفيد منها فى باقى مغامراتك

فانا لست من تلجأ اليها لتشبع رغباتك فى تحقيق ذاتك
ولست من تقضى معها وقت فراغك

وان اصبحت يوما هكذا فلن اسامح قلبى الذى اخطئ فى اختيارك
وصدق زيف مشاعرك وكلماتك

اســـــــــــــفه سيدى
فانا لست تلك الانسانه

ولكنى كنت اتمنى ان اكون جزء من حياتك
ان تجد فى قلبى ذاتك

والا اكون سطر فى مذكراتك
ولكن اتمنى ان اكون كل كلماتك

فانا لؤلؤه معلقه فى عنان السماء
ولست ورقه مهمله ملقاه فى الطريق يتقاذفها من يشاء

اســــــــــــــــــــــفه سيدى
فانا لست هى

عجبى






إنسان مخلوق من العدم 
كل خطواته يسبقها الندم 
ده لو غلط بيحط راسه ف التراب زى النعام 
وكمان ساعات بيمشى ف قطيع كيف الغنم 

وعجبى 
!!



فى ناس بتخنقنا 
وناس من كتر خنقتها خنقانا 
وناس بتحاول تشيل عنا همومنا 
وناس بكلامها قتلانا 

وعجبى
!!! 

فى حاجات كتير ممكن نعيش فيها

أحلى بكتيير من اللى احنا فعلا فيها
بس اللى يفهمها
وفعلا يدور عليها
 وعجبى
!! 


ده طير صغير
 ف الحب فكر
 جرب يحب
 جناحه انكسر 
وعجبى
!!



السبت، 27 أغسطس، 2011

القرآن الكريم



بسم الله الرحمن الرحيم


( وإذا قرئ القرآن فاستمعوا له وأنصتوا لعلكم ترحمون )

صدق الله العظيم


موديولات طالب محظوظ 2




بايو بايو بايو بايو

هندخل فى الجد بدون مقدمات

ياحلولى ياحلولى وخلصنا اول موديول بالسلامه

وهنبداءفى الموديول التانى

بيقولو اننا اخيراااااااااااااا هنحس اننا بقينا فى كلية طب

يبقا اكيد هنشوف الجثه:P

لاااااااااا اصبرو شويه الجثث جايه جايه يعنى هيودوها فين

الموديول ده يا حلوين هناخد فيه البايو:D

بايو مين ياعم الحج

البايو ايها الجهلاء يعنى الكيمياء الحيويه

يعنى هندخل المعمل ونشيل البالطو

وااااااااااااااااااااااااااااااو

مهو لو تعرف اللى فيها يافالح ماكنتش فرحت كده جتك نيله

الكيمياء دى احنا لما اخدناها ما كناش زى الناس الطبيعيين

لا دول حشرونا فى قاروره والقاروره دى مش على قدنا 

واحنا مكبوسين جواها ولا احنا عارفين نخرج منها ولا نتحرك فيها 




ياااااااااااااااااه دى بايو يا جدعان عارفين يعنى ايه بايو يعنى.......................................................................

ونزل الجدول وكان اول يوم فى سكاشن البايو ده كان فى فرح عندنا كلنا

اطلقنا عليه يوم البلاطى العالمى

عقبال كده مانقول يوم السماعات العالمى

مهو احنا ناس منظمه ولكل حاجه يوم

محظوظين بقا 

يااااااااااااااه هنشيل البالطو اخيرا هنحس اننا دكاتره وفى كلية طب مش اداب

ورحت الكليه انا والالطو كبعا:P ويارتنى مارحت واخدت محاضرتين بايو فى العضل

الحمد لله وبلافخر يعنى مافهمت اى شئ

كنت بحاول افهم بس استحاله كلام مجعلص مبعلص

ممكن تقول طلاسم او شفرات هى حاجه من هذا القبيل

ورحت السيكشن بس السيكشن كان مش بطال

والحق يتقال يعنى وماحدش يزعل

ان سكاشن البايو دى كانت من احسن السكاشن اللى اخدناها

بس امتحان عملى البايو كان لا تعليق 

شفت شفت شفت شفت شفت 

ومن هنا تبداء رحلت الالف ميل مع البايو وسكاشن البايو

وتبداء الناس تكره اليوم اللى فكرت تلبس فيه البالطو

وبعدماكان البالطو ليه هيبه ومكوى ونضيف تعالى اتفرج بقا على اللى حصله

والاهانه اللى بقا فيها الناس كانت بتطلع همها فى البالطو يا عينى 

قال بالطو قال يابنى مش كل من مسك بالطو بقى دكتور ولا كل من دخل طب بقا محظوظ 

نحن نختلف عن الاخرين 

لا وايه بقا بدأت رحلة البحث عن الكتاب

زى رحلة البحث عن الجزيره المفقوده بالظبط 

والموديول اصلامزنوق وحالته حاله والكتاب ماينزلش غير بعد ماكنا اخدنا كم زى الفل والله

بس كانو بينزلو المحاضرات على السيت

ربنايكرمهم بس مهمانزلو ده مايغنيش عن كتاب فى ايدك تبهدل امه

ونزل الكتاب وياااااريته مانزل كان الكتاب الاخضر لا مش بتاع القذافى ده بتاع البايو بس مايفرقش عن القذافى حاجه

صراحه يا جماعه حرام اللى احنا شوفناه ده يعنى ايه محاضرتين بايو فى اليوم يعنى 12 محاضره فى الاسبوع ده غير السكاشن

واللذى منه يعنى محاضرتين بسلطاتهم وبابا غنونهم 

ده غير ال tbl

لا وكمان كان فى ايام بنخلص الساعه 8 و6 وكانت المواعييد جميييييييييييييييله خالص 

مين يستحمل ده 

غيييييييييييييييييير طلاب الدفعه المحظوظه

اللى هو احنا بلافخر

واستحملنا وكله جه على صحتنا وعفتنا

وخلص الموديول بتاع البايو ده مش بسلام قوى يعنى بس اهه خلص

وابتسامنا وقولنا ان شاء الله اللى جاى احسن واحسن

مهو احنا ماكنتش ورانا اى شئ غير اننا نبتسم

مش احنا فى طب الاسكندريه ومش اى دفعه داحنا المحظوظين يا عم الحج

ناخد كل خبطه واختها ونبتسم برضو :D:D

يالاماحدش واخد منها حاجه

ابتسمو ابتسمو 

والى اللقاء فى حلقه جديده من موديولات طالب محظوظ

موديولات طالب محظوظ 1



أول حلقه واول موديول
الناجح يرفع أيده

لولولولوى ماتتخضوش كده دى ماما بتزرغد لا اتخطبت ايه بس دى نتيجة الثانويه العامه طلعت وبلا فخر احم احم بنتها الشطوره جابت مجموع عااااااالى قرب الميه كده والبيت كله مظآطت ومبسوط لولولولولولولوى
المهم المهم جيت بقا للمرحله العصيييبه مرحله التنسيق :)

طبيعى يعنى واحد جايب مجموع عالى يوديه طب هيروح فين أداب مثلا بدون تفكير طب طبعا ده اصلا لو حد فكر فى غير كده هيأخد على دماغه على طول
يا سلام طب طب هبقى دَكتوُره والبس البالطو الابيض والبدله الاخضره

يا حلولى يا حلولى
ومرت الاجازه زى الصاروخ وطول الاجازه طبعا بحلم بالكليه والبالطو اييييييييييييييييه دنيا

.........


ياااااااااااااااااه النهارده اول يوم ليا فى الكليه ياترا اخد البالطو والالا اخده والا لا بس بيقولو ان اول يوم ده فيه حفلة العميد يعنى مش هنحتاج البالطو
ابقا اخده بقا من اول تانى يوم كده ان شاء الله

ده حوار كان بينى وبين نفسى اول يوم فى الكليه
معلش يا جماعه اصل اول حاجه عملتها لما جالى فى النتسيق طب انى اشتريت البالطو وكنت كل يوم بحلم باليوم اللى تبدأ فيه الدراسه علشان اتعايق بيه قصدى البسه :D

ياسلام بقا صحيت الصبح بدرى وجهزت نفسى وماما عملتلى السندوتشات :D بتضحكو على ايه عااااااااادى يعنى مش لازم اتغذى دانا داخله على مرحله عصيييبه انا داخله طب يا جدعان يعنى مش اى كلام ومشرحه وجثث وبلاوى سوده
ورحت الكليه وقبل ما ادخل لقيت واحد واقف وامن مشدد على الباب وبيقول الكارنيه يا دكتوووووووووره

كارنيه ايه ياعمو انا مش معايا كارنيه دانا لسه فى سنه اولى
طيب ادخلى بس اعملى الكارنيه فى اقرب وقت وهاتى معاكى كل يوم الحافظه علشان ادخلك بيها

حاضر يا عمو هجيب الحافظه الاحمره دى معايا
هييييييييييييييييييه دخلت الكليه :D:D:D

ياااااااااااااااااه دانا بحلم باليوم ده من زمان
ورحت بقا على قاعة المؤتمرات وهناك شفت اشكال واللوان من الناس

اليوم ده بيفكرنى باول يوم فى الحضانه وانا شايله سندوتشاتى وشنطتى وماسكه فى ايد ماما بمريلتى العجيبه اللى فوجئت ان كل العيال لبسين زيها وشوفت اشكال ناس ماشوفتهاش فى حياتى وكنت خايفه وعايزه اعيط
هو بقا نفس الاحساس بس ماما ماكنتش ماسكه فى ايدى ولا كنت لابسه مريله

بس تغلبت عليه لما جه باقى زملاتى اللى كانو معايا فى الثانوى
وقالو اننا لازم نعرف ارقامنا الاول

ف روحنا عند شئون الطلبه
وعرفت كل واحده مننا رقمها وسيكشنها ومجموعتها

وداخلنا بقا قاعة المؤتمرات وابتداء الحفل الساهر للترحيب بفرسان الثانويه العاميه
بس كان حلو والله اى نعم القاعه كان فيها يجى الف نفر وانا كنت مزروعه خلف القطبان فى اخر صف وماكنتش شايفه والا سمعه اى شئ بس كانو بيقولو انه كان حلو,,,,

وفجأه وبدون اى مقدمات
قال ايه الجدول نزل وفى ناس عندها محاضرات دلوقتى

يالهوى بس انا ماجبتش البالطو
ورحنا بقا المحاضره

وانا جوايه احساس انى بقا اشوف جثه(فى المحاضره ههههههههههههه هبله من يومى) مش كلية طب هشوف ايه يعنى J
ودخل الدكتور وكانت الساعقه

انها محاضرة احصاء
احصاء ايه وكلام فاضى ايه

هو انا دخلت هندسه وانا مش واخده بالى والا ايه
ودخل الدكتور وقعد ساعه كامله يتكلم وانا مش فاهمه اى حاجه بصيت حواليا لقيت نص المدرج نايم

فقولت مابدهاش بقا :)
فنمت انا كمان وصحابى صحونى واحنا مروحين

مجتهده من يومى
وابتدت رحله دامت اربع اسابيع باين والا ايه مع المصطلحات الطبيه والاحصاء والتعليم الالكترونى واخلاقيات المهنه:(:(

اصلنا يا اخوانى نظام جديد انتيجريشن يعنى لا ولسه ياما هنشوف
بس صراحه الموديول ده كان ظريف ولطيف كنت بتحس فيه انك فى كلية اداب والا تجاره وتقول يااااااااااااااه امال بيقولو الطب صعب ليه

ما انت ماكنتش تعرف الخيبه التقيله اللى جايه
وسمعنى سلام ياما فى الحبس مظاليم

انا بقا فضلت كل يوم وانا رايحه الكليه اشوف الاخوه بتوع صيدله واسنان وهما شايلين البالطو واتحسر على حالنا واحلم كل يوم بالبالطو حاجه كنت مفكره ان البالطو ده للمنظره ماكنت اعرف اللى فيها ويا رتنى ما عرفت
اممممم افتكر ده ملخص اللى حصل
سلاااااام اشوفكم فى حلقة جديده 

الخميس، 25 أغسطس، 2011

حمقاء






جميع افكارهم واحده,,

جميعهم يرون الشياطين

وهى وحدها من ترى الملائكه

ستظل طوال حياتها تتجاهل الرأى الآخر

ولا تسمع سوى نصيحة قلبها

حقاً حمقاء,,

سيدى







سيدى
كبريائى يمنعنى من الاقتراب منك
وقلبى يخشى البعد عنك
فبالله عليك اخبرنى
اخبر قلبى 
ماذا يفعل؟؟؟!!
أيها القريب البعيد,,,,,,

أين أنت ,,,






كنت أرغب في أن تكون أول المهنئين ،، 
أن تمنحني وردة بنفسجية عطره ،،
وقطعة حلوي بطعم الأمل ،، 
ولكن أين انت,,,
أنت هنآآآآك
بعيداً تعيش فى خيالى فقط
أيها القريب البعيد.............
اشتقت إليك ^^
ولكنى سأعتاد ألا اشتاق ثانيتاً

أمنية




قالت له يوما 

أنها لن تطلب منه أن يمنحها هذا الإحساس ابدا 

عليه أن يفعل من تلقاء نفسه 

مرت الأيام تلو الأخرى ..... 

وهو لم يفعل 

قلبها يتمزق

وهولا يشعر

ومع ذلك,,,

لن تطلب 

وترجو أن ما لم تطلبه يتحقق

ليته يتحقق!!

الثلاثاء، 23 أغسطس، 2011

كحك العيد

يااااه النهارده كان يوم  غير عادى
عارفين ليه....
اصلنا عملنا كحك العيد 
بجد انا مبسوطه قوى
مش علشان عملنا الكحك
لا طبعا
ما الكحك بيتعمل كل سنه
انا بقا مبسوطه علشان كان اليوم جميل خالص
عايزنى احكيلكم عليه
لا مش هحكى
أممممممم
سمعتك انت اللى بتقرا هناك انت
بتقول ايه الرخامه دى
مااااشى بالعند فيك بقا
انا هحكى
جه عندنا فى البيت ناس كتييير قرايبنا
جدتى وخالتى وناس تانيه كتير 
كنا لمة وعيلة 
والبيت كان فيه فرحة كبيرة 
هما بقا جايين 
قال ايه علشان يساعدو ماما فى الكحك
حجج فارغه...^^
دول اصلا جايين علشان يرغولهم رغييتيت
ويعرفو اخر الاخبار
اللى فى الوسط العائلى
والاجتماعى والجيرانى المحيط
المهم
اتجمعنا كلنا
وبدأنا ننقرش الكحك
وانا كنت بنقرشه جمييييييييييييييييل
وماما قالتلى شطوره يا روشة 
بس حصل ازمه فى المناقيش
اممم
هنعمل ايه ,, هنعمل ايه
للاسف  جدتى اقترحت اننا نروح نجيب مناقيش من عند الجيران
ماما قالت ما فيش  غيرك اللى يروح يجيب
نعم ليه بقا ان شاء الله
ماعندك اتنين تانيين
قالتلى الله يعنى اختك الكبيره اللى بقت عروسه تطلع الشارع و تروح للجيران كمان
والتانيه ثانويه عامه مش فاضيه 
يووووووووه بقا يعنى ما فيش فى البيت ده غيرى 
هروح وامرى لله
ورحت لابسه حتت عبايه وحتت طارحه كنت شبه الحاجه ستوته
ورحت للجيران مالقتش عندهم قعدت الف من بيت لبيت واقف مع دى على الباب شويه 
واتكلم مع دى شويه
وايه كان مولد
بس كنت فرحانه قوى
وحسه بفرحه العيد قوى
اكيد مش زى زمان
بس كانت فرحه بقالى كتييييييييير قوى ما حستش بيها
والناس وهما متجمعين عند بعض وبيساعدو بعض
ولما يخلصو الحاجه يدوقو بعض
والباب لما يخبط وتلاقى واحدة جارتكم جايه تسأل مامتك عن طريقة عمل البيتيفور
يااااااااااااااااه حاجات بقالى كتير ما شفتهاش ولا حسيت بيها
المهم اكيد انتو سرحتو منى
جبت المناقييييييييييييش اخيرااا بعد معاناة 
وقعدنا ننقرش بيهم ونزوق الكحك
وانا بقا قعدت افنن تفانين زى العيال الصغيرين
 بجد كنت مبسوووطه قووى
مبسوطه بالمه والعيله
مبسوطه بالفرحة اللى فى عيون اخواتى الصغننين وهما بيلعبو بالعجين
مبسوطة بالجو اللى كنت فيه
وبحلاوة جيرانا
والحب اللى فى شارعنا
مبسوطه اننا ممكن نرجع تانى زى زمان
الناس فى قلبوبها خير وحب لبعض
ورمضان يبقا زى الاول
فيه طبق واحد بيلف علينا كلنا وعند كل واحد يوم
ياااااااااااااااااه
ربنا قادر يصلح كل حاجه
الدنيا تنور من تانى
المهم بقا
أذ فجأتن
ماما قالتلى قومى اعملى عصير 
قولتلها حاضر يا ماما
ماانا عسوله وبسمع كلام ماما على طول 
اه انا
فيها ايه دى
رحت بقا على المطبخ
وعملت العصير وكان جميييييل خالص
بس برضو
أذ فجأتن
وانا مسكاه فى ايدى
راح واقع عليا
واستحميييييييييييت بالمانجه
هيييييييييييييييه
يا نهااااار
كان شكلى تحفه
رحت استحميت بسرعه وعملت عصير تانى
علشان ما حدش يكتشف الواقعه
ويقول عليا فشله لا سمح الله يعنى
بس الصراحه 
انا صارحت ماما على السحور واديتها تقرير مفصل بالواقعة
وقالتلى عادى ماانتى فاشله مش جديده يعنى
أحم اصل ماما بتحب تشجعنى
امهات اخر زمن بقا
بس بس احسن حد يسمعنا
,,,,,
ربنا يجعل ايامنا كلها عيد وفرح وحب
يااااااااااااارب
اسيبكم بقا واروح اكل الكحك اللى انا منقرشاه بأديا




الأربعاء، 3 أغسطس، 2011

شخصيتى



أتَى إلى غرفتِى وطَرق الباب فأذنتُ له بالدخولِ ,
فنظر إلى نظرة غَير مُعتاده وفاّجأنى بقوله
 ~ أحترت فى تحليل شخصيتك~
 وهَم بالرحْيلِ وتَركْنى وسَط دواّمه من الأستعجابِ والأستنكارِ
فكْيف له ألاّ يعرِفنى؟!
كيف يحُلل شخصيات كل من يعرفٌ إلا أنا ..؟
فأنا احيا بْين راحتيه منذُ
أنّ اقَبلتُ إلى هَذه الحَياّةِ
قد تكون حِيرته تلك لجْنونى احياناً
 لضَحكَتى وسط احزانى
او لافكَارْى وخِططى الجُنونيه
 وقَراراتى العَبثْية الطفْولية
 أو لأسباب أخرى لا يعلمها سواه
ولكن لا تخَفْ فشَخصِيتى بسيْطه حدَّ التعِقيد

الثلاثاء، 2 أغسطس، 2011

شبحى



شعور بالوحدة يسكننى ,
 الجميع حولى ولا اشعر منهم سوى بأصوات أنفاس متلاحقه~
أبحث حولى عن يد خفيه لتمسح دمعى
فلا أجد سوى شبحى النفسى
الذى يتجسد لى كل ليلة ويطاردنى بقهقته الصاخبه 
ويشعرنى بالفزع
وبرغبة فى البكاء أكثر وأكثر
أتعجب من السر وراء تلك القهقه
 أهو يضحك مستنكراً أفعال قرينه الأنسى
 أم كى يكسر حاجز السكون حولى ويفزعنى,,
ولكنه يعلم حجم الصخب والمنازعات داخل نفسى
 فهو الشاهد الوحيد على محاكمتى العسكرية
 وأحكامى المتشدده التى تفتقر الرحمه على أنا .................
فأنا استحق فى هذه الليله حكم مؤبد بالحبس داخل صومعتى الفكريه
 كى ابحث حالتى السيكولوجيه
وانفرد بخواطرى
واتخلص من هواجسى النفسيه
ولكنى اتيقن أنها هتضيق بما داخلى من أفكار وآلام,,
الحمد لله اخذنى الحديث وتناسيت أمر الشبح
ولكنه عاد بقهقه من جديد واخرجنى من خلوتى
سأذهب أليه وسأبكى بين راحتيه 
فصوت بكائى يضعف صوت قهقهته
ويريحنى,,,