الأحد، 23 أكتوبر 2011

كلام مالوش لزمه .... متجدد




ساعات بحس بالبرد

 فى عز الصيف 
ولو اتغطيت بكل الغطاء
 اللى فى الدنيا مش بتدفى
 اكيد انت عارف ليه 








حاجه غريبه جدا 
النهارده قررت انى اقفل صفحه من حياتى 
بدايتها اسمك ونهايتها اسمك
بدايتها حبيتنى
ونهايتها حبيتك
لدرجه انى بدأت اكرهك
خفت على نفسى من الجنان
اصلى بحب ف خيال 
وخفت عليك من جنونى وانانيتى
بس تخيل بقا ايه اللى حصل 
الساعه تلاته الفجر 
الاقى نفسى قايمه من السرير  والدنيا برد
ورايحه على المطبخ وبعمل مكرونه 
بعد ما خلصتها 
قعدت اضحك واضحك واضحك
اكيد عرفت ليه 
;)
عشان افتكرتك وانت بتاكل مكرونه بالليل 
وانا بتريق عليك
وبقولك 
يا خبر
فى حد يأكل مكرونه دلوقتى
وانت تقولى 
اعمل ايه جعاااااااااااان 
وده اللى قدامى
:)
عارف انا ساعتها بس 
حسيت انك فعلا جوايا 
ساكنى
مش بس ساكن قلبى
لا انت ساكن كلى
ومع ذلك برضو
همسك صفحتك دى واقطعها 
على امل انى اكتبها تانى معاك 
نمسك قلم واحد ونخططتها سوا 
..........




الجمعة، 14 أكتوبر 2011

مدوونتى وحشتنى



يااااااااه مدونتى حبيبتى
 بيتى التانى وصديقتى
وحشتنى جدااااا
 ووحشنى الرغى هنا مع نفسى
والتطفل على المدونات التانيه 
بس الظروف كانت كده
 دلوقتى مش عارفه ليه عايزه اتكلم
 واطلع كلام كتير محبوس جوايا
 بس الايام اللى فاتت علمتنى انى مااتكلمش لما اكون عايزه اتكلم
عشان ماارغيش كتير وماابوظش الدنيا كالعاده يعنى
ولاسباب تانيه كتير
 بس انا اللى هقوله دلوقتى
ان بجد الاسبوعين اللى فاتو كانو من احلى الايام
 وعشت اوقات جميله مع صحبه اجمل