السبت، 3 سبتمبر، 2011

موديولات طالب محظوظ 4



وخلص التيرم الاول الحمد لله 

وخلص اليوم ونص الاجازه 

وهنبدا تيرم جديد

لا مش تيرم جديد وبس لا احنا بعد امتحان السمستر والضرب اللى كان فيه اخدنا كلنا قرارات حاسمه تجاه الكليه والدراسه وكان القرار كالآتى 

بسم الله

قررنا نحن المحاظيظ 

أن نبدأ هذا الموديول بداية حسنه

وأن نذاكر من أول محاضره

والا نترك عمل اليوم الى الغد 

ونتعلم من اخطائنا 

, ونعمل بكل جد واجتهاد وإخلاص

,,, والله ورسوله على ما نقول شهيد 

الله 

الوطن 

المحاظيظ
...
هههههههه ابقى قابلنى

على فكره القرار ده كان الروتين الطبيعى للمحاظيظ ف بداية كل موديول جديد وعمرهم عمرهم ماالتزمو بيه اكتر من يومين 

مهو هيعملو ايه يعنى الكتاب مش بينزل ف اول الموديول

لكن نظراً لحرص الكليه الشديد على مصلحة الطلاب قررو ايه بقا

طبعا زى ماقلنا قبل كده 

انهم ينزلو المحاضرات على السيت

فكان المحاظيظ فريقين فريق بيذاكر من على الجهاز لحد عنيه ما مققت وبقا بأربع عيون

وفريق بيطبع المحاضرات لحد ما فلس يا ولداه

فكل ده كان بيخليهم ما يلتزموش بقرارتهم 

يعنى يموتو نفسهم مثلا 

دى حكاية والله 

المهم بقا بدأنا الموديول 

بس أيه اللى حصل 

مممممم 

الكلية يا سيدى نقلتنا للمواساة

واخدو قرار ان من اول اولى لحد تالته فى المأساه

ومااقولكش بقا عن المكان هناااك

تحس كده انك ف منطقه مهجوره 

المقابر جمبك 

ومستشفى جمال عبد الناصر ف وشك 

والخلااااااااااااااء ف قفاك

مكان فلة شمعه منوره 

ونظرا لحرص الكليه على صحة الطلاب طبعاً

عملت لهم جونييينه

دى بقا مااقولكش الكلام عنها عاايز يوم لوحده 

هى بالمختصر كده

شبه جبلاية القرود

ومليانه خضره وشجر وورد وحاجات جميله وقرود قصدى محاظيظ 

نبقا نتكلم عنها بعدين 

مش موضوعنا دلوقتى الله

موضوعنا دلوقتى المصيبه اللى حصلت 

-مصيبة ايه كفاله الشر

اقولك يا خويا 

ماانت ما تعرفش الموديول ده هتدرس فيه ايه 

-..أيه جثث ,,,:D

جثث تااااااااااانى ما تهمد شويه بقا

اقولك 

هتدرس باثولوجى وفارماكولوجى وكميولوجى قصدى كميونتى 

-طب وفيها ايه دى 

يااانهااار دى فيها وفيها وفيها

الباثولوجى والفارما دول مواد من سنة تالته

واحنا لسه سنة اولى لسه فرافير يعنى

هندرس الكلام ده ازاى

- اه صح ياوجعه مربربه وبعدين هنعمل ايه 

ولا حاجة طبعا هتدرس اللى هيدهولك زى ال ........لاموأخذه 


المهم بقا بدأنا الموديول فى المواساة الجميييله خااالص دى

والمدرج المستعرض الجميييييييل خااالص ده 

المدرج ده بقا غريب غرابه 

بص انا اعرف ان مدرج من اسمه كده بيكون عباره عن درجات 

وبيكون مكان محترم كده وطويل على عريض يعنى متناسق 

اما المدرج المستعرض ده 

كان شبه القاعه كده بس على اهبل شويه 

كان شبه المستطيل اللى طوله اضعاف مضاعفه لعرضه 

و بالتالى ماكنش

فيه اى درجات كان كله مساوى لبعضه 

ده غير انه كان عبارة عن ترابيزات مستعرضه برضو شبه المدرج بالظبط 

وكراسى بس الصراحه الكراسى كانت مريحه جدااااوالنوم عليها كان زى الفل 

داحنا كنا بنام نووووم...............

المدرج بعد احنا ما خلصنا مادخلتهوش ولا دفعه بعدنا الحمد لله 

قلبوه قاعة مذاكره

ده كان اسبشيل كده للمحاظيظ وبس

المهم اللى حصل اييييييييييه ....

ولا حاجه درسنا الباثولوجى طلع ماده بنت حلال الصراحة

ماليانه كلاكيع وكلام مجعلص جعلصه بس احنا ايه نفوت ف الحديد 

والفارمه كانت حاجه بسيطه كده على الماشى 

وخلص الموديول 

اينعم احنا اتظبطنا من الدكاتره

وخصوصا غضب دكتوره ميرفت علينا وخصوصا جروب سى 

الا ان الموديول خلص 

وامتحنا وروقنا وبقينا ضد الصدمات 

كله عادى عادى عااادى بيعدى 

وبس خلاص 






هناك تعليق واحد:

  1. كله كوم والمدرج بتاع الموديول ده كوم تانى احيييه على ده مدرج ياددعان صحيح محاظيظ :)
    كنت باحب الموديول ده معرفش ليه !!!

    ردحذف

اترك لك هنا نبضة