فاكر لما كنا بنتمشى على البحر والدنيا شتت علينا وطلعنا نجرى سوا تحت المطر ونتضحك زى الاطفال الصغيره وانت كنت مبسوط قوى وعشان هدومى كلها اتبلت وانا مش بحب كده ....
فاكر لما جتلى الكلية وقعدت معايا ف الجنينه وروحنا سوا وانت صممت لازم توصلنى لحد البيت وماما ساعتها اتحايلت عليك انك تتغدى معانا وانت ما صدقت وكملنا اليوم سوا حتى وانت مروح فضلنا نتكلم سوا ع التليفون لحد ما نمت وانا لسه بكلمك
فاكر لما اتخانقنا سوا على حاجة تافهه كالعاده وانا قعدت اعيييييييييييييط وزعلانه منك طول اليوم وانت جيتلى بالليل وجبتلى معاك شوكولاتات كتير وصالحتنى وقولتلى (هو فى بنوته شطوره تزعل من حبيبها كده )
يااااااه تصدق وحشتنى الايام دى جدااا
فاكر يا حبيبى لما جالى انفلونزه وكنت تعبانه جدااا ونايمه ف السرير وانت جيت زورتنى واستأذنت بابا انك تدخلى الاوضه عشان تشوفنى وتتطمن عليا وقعدت جامبى واكلتنى شوربة الخضار اللى مش بحبها بس تصدق ساعتها كان طعمها جميييل عشان بس انت بتأكلنى بأديك
وساعتها اتعديت منى وتعبت انت كمان وانا رحت زورتك وكنت لسه تعبانه فاكر ساعتها انت قولتلى ايه .........
قولتلى (يا رتنا كنا متجوزين دلوقت عشان ننام جمب بعض ونأكل بعض الشوربه ونعمل كمدات سوا )
فاكر كمان يوم ما نجحت وأخدت البكالريوس وجه معاد حفلة التخرج بتاعتى وانت جيت وكنت جامبى طول الوقت وانا كنت خايفه ومرتبكه جدااا بس وجودك جامبى طمنى جدااا
طيب بقا فاكر لما كنت عازمنى على ايس كريم بالشوكولاته اللى بحبه جدااا وكنت اليوم ده وسيم خالص ورومانسى جدااا وشكلك غريب كده لا مش زى مافهمت انت طبعا دايما وسيم وشيك ورومانسى بس حسيت ان الموضوع فيه إنه ..
وفجأة لقيتك قمت من على الكرسى ومديت ايدك ليا ومسكت بأيدى وقولتلى كل سنة وانتى حبيبتى كل سنة وانتى معايا
ورحت عطينى كتاب انا بحبه جدااا وكان نفسى اشتريه وكنت كاتلى جواه اهداء جميل (إالى حبيبتى وطفلتى المشاكسة )
بجد ساعتها انا كنت مكسوفه جداا وفرحانه قوى وزعلانه قوى برضو
فرحانه انك افتكرت اليوم ده يوم ميلاد حبنا وزعلانه انى والاول مره انساه
مكسوفه عشان انت كان صوتك عاالى وكل الناس التفتت ليك وكانو بيتفرجو علينا
ياااه اليوم ده كان تحفه قضيناه كله مع بعض
لعبنا واتفسحنا وضحكنا من قلبنا زى الاطفال
يااااااااااااه انا بحبك قوى
بحبك وانت فرحان ومبسوط
وبحبك وانت متدايق عشان بتقرب منى اكتر وبحس بوجودى معاك
بحبك لما الدنيا تديق بينا وننسى كل العالم ونكون سوا
بحبك وبشوف الدنيا بعنيك بحس انك ابنى وانى بنتك
بحبك لما بتحتوينى وتفهمنى وتشيل عنى كل همومى
بحبك وانت قريب منى وبحبك وانت بعيد عنى
عشان بعدنا هو اللى بيقربنا من بعض اكتر
بحب علاقتى المعقده بيك
وبحبك انت بكل عقدك وفلسفتك وكلامك المجعلص اللى مش بفهمه ساعات كتير
بحبك وانت بقتولى تتجوزينى
يااااااااااه بحبــــــــــــك
بحبك يا كل كيانى
انا فاكره كل حاجه حصلت بنا وكل حاجه ماحصلتش وكل حاجه لسه هتحصل
ليك ذكريات ف قلبى هى دى اللى انا عايشه بيها وعشانها
.................................
كل دى حاجات عمرها ما حصلت
وعمرى ما عشتها
بس دايما ف خيالى
بتمنى اعيشها ف الواقع
مع حبيبى وجوزى وابنى وابو عياااالى
بحبك من قبل ما تيجى واعرفك وتقولى هل تقبلين بى زوجاً لكى
